Mer saage nyt
Impressionen
Zeedel
Saisch hitzedaags emoll dy Mainig
und ebber goot nit mit dir ainig
wird als wie mee nimm dispediert
nai, hitte wirsch ganz ungeniert,
will Aastand fascht scho nimme zellt,
in dr aint oder ander Egge gstellt.
De muesch uf jeede Fall baraad sy
as es grad haisst, de sygsch e Nazi
oder umgekeert halt au
de sygsch e linggsversiffti Sau;
e Sinder geegen e Wält, e gsundi,
oder halt en Oeko-Fundi.
Wenn das nit wottsch, no ischs Fazit
machs wie mir, mir saage nyt.
Rieft ain „Rassismus“, no kas eso go:
me goot uff d Stross fir e Gugge-Logo,
maint, das syg Lokalkolorit,
sunsch syg me jo Kosmopolit,
aber doo ebbis ändere giengi z wyt.
Und mir, mir saage nyt.
Uss dr Schwyz, so het me gsee,
fliesst vyyl Gäld zer AfD.
Das Gäld kunnt dängg uss em Beryych
vo ryyche Dytsche firs dytsche Ryych.
E Kredit fir wievyyl Zyt?
Ächt dausig Joor? Mer saage nyt.
Wägenem Gäld fir e dyyri Rais
gits bim Maudet z Gämf vyyl Mais.
No blybt er in der Regierig dinn
wenn au eender frey vo Sinn.
Er gläbt an sym Sässel wie Zementit.
Wie lang ächt no? Mer saage nyt.
Dä Migrationspaggt het gmacht, dass ys
schwindlig wird ab em FDP-Cassis.
Dergeege, derfiir, denn dergeege plediere.
Derfiir no mee Waffe exportiere
wott dä SVP-Satellit.
Dängg was de wottsch, mir saage nyt.
Villicht goots em au wie sälle Drepf
vo dr SVP und de vyyle Gnepf.
Bi mee as aim Gnopf wisse die nimme
wie sy was und wieso selle stimme.
Wärs Buschi ächt besser as settigi Lyt?
Ääs het nyt gsait und au mir saage nyt.
Dr „shut down“ macht e Huffe hii,
e „shut up“ wär dängg besser gsi.
Jetz het er immer no kai Kredit
s blybt ainzig s gaischtig Defizit.
Und wääreli wäär het dr Profit?
Hmmmm, mer saage nyt.
Mer halten ys druss ganz explizit.
Ins Fyyr kai Sprit, kai Dynamit,
kai Appetit uff ständig Stryt,
mer gänn nit zrugg und sin denn gyt.
Mer blyybe hart, hart wie Granit,
stumm wien e Fisch: mer saage nyt.
Saisch hitzedaags emoll dy Mainig
und ebber goot nit mit dir ainig
wird als wie mee nimm dispediert
nai, hitte wirsch ganz ungeniert,
will Aastand fascht scho nimme zellt,
in dr aint oder ander Egge gstellt.
De muesch uf jeede Fall baraad sy
as es grad haisst, de sygsch e Nazi
oder umgekeert halt au
de sygsch e linggsversiffti Sau;
e Sinder geegen e Wält, e gsundi,
oder halt en Oeko-Fundi.
Wenn das nit wottsch, no ischs Fazit
machs wie mir, mir saage nyt.
Rieft ain „Rassismus“, no kas eso go:
me goot uff d Stross fir e Gugge-Logo,
maint, das syg Lokalkolorit,
sunsch syg me jo Kosmopolit,
aber doo ebbis ändere giengi z wyt.
Und mir, mir saage nyt.
Uss dr Schwyz, so het me gsee,
fliesst vyyl Gäld zer AfD.
Das Gäld kunnt dängg uss em Beryych
vo ryyche Dytsche firs dytsche Ryych.
E Kredit fir wievyyl Zyt?
Ächt dausig Joor? Mer saage nyt.
Wägenem Gäld fir e dyyri Rais
gits bim Maudet z Gämf vyyl Mais.
No blybt er in der Regierig dinn
wenn au eender frey vo Sinn.
Er gläbt an sym Sässel wie Zementit.
Wie lang ächt no? Mer saage nyt.
Dä Migrationspaggt het gmacht, dass ys
schwindlig wird ab em FDP-Cassis.
Dergeege, derfiir, denn dergeege plediere.
Derfiir no mee Waffe exportiere
wott dä SVP-Satellit.
Dängg was de wottsch, mir saage nyt.
Villicht goots em au wie sälle Drepf
vo dr SVP und de vyyle Gnepf.
Bi mee as aim Gnopf wisse die nimme
wie sy was und wieso selle stimme.
Wärs Buschi ächt besser as settigi Lyt?
Ääs het nyt gsait und au mir saage nyt.
Dr „shut down“ macht e Huffe hii,
e „shut up“ wär dängg besser gsi.
Jetz het er immer no kai Kredit
s blybt ainzig s gaischtig Defizit.
Und wääreli wäär het dr Profit?
Hmmmm, mer saage nyt.
Mer halten ys druss ganz explizit.
Ins Fyyr kai Sprit, kai Dynamit,
kai Appetit uff ständig Stryt,
mer gänn nit zrugg und sin denn gyt.
Mer blyybe hart, hart wie Granit,
stumm wien e Fisch: mer saage nyt.
