Fasnacht 2025 (AGa)

Exgysi und retour
Duesch dehai mool Ornig mache,
findsch du ganz e Huuffe Sache.
Daas isch guet, so solls au sy,
aber gheert au alls dy?
Bimne Buech saisch hit, syg dyns,
aber s isch am Nochber syns.
Exgysi und retour?
Nai, dä Nochber isch en alte,
dorum duesch das Buech jetz bhalte.

Ai so Ding z ha, isch zwor lausig,
stell der voor, de hättsch zig-dausig.
Was machsch denn, hesch no Idee,
frooge sich hit au d Musee.
Vyl Objäggt hets suuber trennt,
wos Museum gar nit kennt,
doch s Museum suecht jetz Spuure
bsunders daas vo de Kultuure,
denn e Bsuecher sait emoole,
lueg, dä Baumstamm doo isch gstoole.
Dää vermisse, daas betoon er,
in Australie d Uurywooner.
Exgysi und retour
S isch scho fascht e beese Draum:
retour mues dä Thulu-Baum.
doch d Australier saage gly,
loos, mer gänn eich ai Kopie.
Soo hesch s Weggli und der Batze.
Basel zaigt sy woori Fratze.

S isch dä Baumstamm haimekroche.
Wyter goots mit Menscheknoche,
wo me mit vyl Sammligswuet
dert in Ceylon sammle duet.
Ungärn saag is jetze gly:
Gsammlet hänn zwai Saresy.
Fritz und Paul dien alles nää
unds bald am Museum gää.
D Direktoorin isch z beduure:
Wider daas vo de Kultuure.
Exgysi und retour
S nimmts e Stamm hit uus Sri Lanka
mit sym Chef und groossem Dangg aa.
S darf der Chef ins Roothuus koo
und der Cramer sait dernoo:
Ych gib dir mit Kennerbligg
guet verpaggt die Knochestigg
imne wysse Syydeduech.
S isch e Saresinsche Fluech,
doch der Chef sait ganz entschiide:
Jetz herrscht ändlig Seelefriide.

S git no mängg so Kuckucks-Ai.
Basel isch do nit elai.
Wenn me Raubkunscht sueche soll,
isch z Paris der Louvre voll.
Ghoolt hets Zyg dä mit em Käppi,
vo de Kriegsziig bringts der Näppi.
In däm Louvre suecht er wild
fir sy Schloofgemach e Bild.
Äär will doo sy Paradys ha,
dorum hoolt er d Mona Lisa.
Dääglig schlooft er soo perplex y:
Die gilt doomools no als sexy.
Nur der Louvre wartet gspannt,
bis men z Elba fescht verbannt.
Fir d Mona Lisa haissts: Exgysi und retour

Äänlig goots, me waiss es hitte,
au do ääne bi de Brite.
S Britisch Museum isch banal
aifach zimlig kolonial.
D Brite hänn d Museumswaare
kischtewys no Londe gfaare.
Exgysi und retour?
Nai, denn s haisst jetz very british,
dass mit Zrugggää hit no nyt isch.
Daas z verstoo, fallt nit so schwäär,
denn s Museum wäär sunscht läär.

Aber fertig sinn so Dänz.
Hitte zellt au d Proveniänz.
D Forscher wärde drum ganz rammlig
bsunders bi der Bührle-Sammlig.
Liebi Zircher, s isch nit z gspasse,
doo mien iir go noochefasse.
Denn haissts: Exgysi und retour

Wie haissts doch, so wurd i maine:
«Lügen haben kurze Beine».
Bi dym kaibe Buech im Schaft,
saisch villicht mit letschter Kraft:
Exgysi und retour

Liebi Schnoogge, sowyt kunnts.
Giltet daas ächt au fir uns?
Luegsch mool zrugg, es wär glaub wichtig,
denn zellsch uns zur Alte Richtig,
drum wär d Froog am Cliquebott,
ob me uns jetz zrugggää sott.
Loos, mir dien der ARI schrybe,
dass mir unverwieschtlig blybe.
Exgysi und nit retour