Fasnacht 2025 (Stamm)

Au die koche nur mit Wasser

Läng mr s Gweer! Nunde Gugger!
Was isch aigentlig los mit unsere Schugger?
S sin offebar – so het me s vernoo –
E baar em schlächte Gschmagg verkoo.

Au wenn dr Schugger hüt mit em Hirni sott dängge,
löön vyyli Schugger sich vom Knübbel lo längge.
Als Politesse hesch s drum hart, ob Talänt oder Graft,
wirdsch mit offenem Muul vo baar Bögg aagafft.

S sin laider nüm nur e baar Schugger wo vom Wääg abdrifte,
s seg die ganz Arbetskultur wo dr Ruef däät vergifte.
E Mänge gseet jo, was dört so bassiert,
aber kain sait öppis – es wird toleriert.

Und wenn d öppis saisch, gseesch was bassiert,
wirdsch ins Büro verbannt oder grad suschpendiert.
S Korps wird drum glainer – und dr glai Maa wird blass,
wenn s so wyter goot, muess d Eymaa glyy sälber uf d Gass.

E huffe hän gstuunt und s het e mänge schockiert,
wo sy ghört hän was do bi unserer Bolizei bassiert.
Em Aint oder dr Andere isches s Härz wo jetzt pocht,
well sy mergge, ass au e Schugger nur mit Wasser kocht.

Bevor me jetzt schimpft drüber, wie die dört schaffe,
und bevor me sy bezaichnet als Säu oder Affe,
könnt me sich frooge, legsch d Karte uf e Disch,
ob unseri Gsellschaft denn anderscht isch?

Zum Grüüsel finde, kasch scho uf e Boschte,
kasch aber au in d Kirche oder in Kreml im Oschte.
Kasch in d Musikinduschtryy oder au in d Finanze,
kasch an d Uni oder ins Ballett wo sy danze,
kasch in d Politik, in d Wirtschaft oder in Sport,
die Grüüsel findsch hüt an fascht jeedem Ort.

Au d Wält-Bolizischte, ääned em Dyych
pfyffe uf Anderi, d Hauptsach bi «YCH»!
So Saich trumpetet s wider us alle Roor,
do kaa me s verstoo, es bluetet aim s Oor.

Es schyynt fascht e so, als syg das die neui Norm:
lääb lieber aigenützig als regelkonform.
Das dängge hüt au die ryychschte Miliardääre,
wär dört noo Moral suecht, gryfft voll ins Lääre.
S isch bitz zum verzwyyfle, do hilft au kai Pflaschter,
me wäält weniger d Tugend und vyyl öfter s Laschter.

S Bedrifft e Mänge, das isch e Sauerei,
aber jetzt usgrächnet au d Basler Bolizei?
Wär setzt ys no Gränze? Wär sorgt no für Rächt?
Wo het s denn no Vorbilder? Sin alli scho schlächt?

Wenn Helde du suechsch, aber findsch se halt nit,
muesch sälber ain wärde, wenn de willsch ass se git.
Aber dängg jetzt nit z gross, s hängt kai Lääbe do draa
s-Held-syy foot maischtens im Glaine scho aa.

Zum Byschbyyl dört wo gärn Strytt dien entstoo,
wenn d Emotione ufkoche und d Wuet foot aa koo,
denn sin maischtens immer die Andere draa Tschuld
aber maischtens fäält alle im Grund gnoo d Geduld.

Au uf dr Strooss gits bi uns nit wenig Situatione
wo sich mee Ruggsicht und Reschpäggt tääte loone.
Aber d Lüt sin halt gstresst, wäge Zyt oder Gäld,
sin im aigene Film und elai uf dr Wält.

Kain isch perfäggt und kain kaa das syy,
aber rysset euch zämme, iir Schugger am Rhyy!
Sunscht mien mir am Änd, statt flueche und bätte,
zue so Schugger no wärde, wie mir sy gärn hätte!

Und wenn s sowyt käämti, y sag s euch ganz frei,
denn brüüchte mir z Basel au kai Bolizei.